എൻ്റർപ്രൈസ് എഐ: ടിസിഎസും ആന്ത്രോപിക്കും സഹകരിക്കുന്നു

കൊച്ചി: ടാറ്റ കൺസൾട്ടൻസി സർവീസസ്, എൻ്റർപ്രൈസ് എഐ സ്വീകാര്യത വർദ്ധിപ്പിക്കാൻ ഉപഭോക്താക്കളെ സഹായിക്കുന്നതിനായി മുൻനിര എഐ കമ്പനിയായ ആന്ത്രോപിക്കുമായി പങ്കാളിത്തം പ്രഖ്യാപിച്ചു. മികച്ച ഉപഭോക്തൃ മൂല്യ നിർദ്ദേശങ്ങൾ, സംയുക്ത വ്യവസായ പരിഹാരങ്ങൾ, ക്ലോഡ് സീരീസ് മോഡലുകള്‍ വഴി മികച്ച എഐ വൈദഗ്ദ്ധ്യം എന്നിവ നൽകുന്നതിനായി ഒരു പ്രത്യേക ബിസിനസ് യൂണിറ്റും ടിസിഎസ് സ്ഥാപിക്കും.

കൃത്യത, ആഴത്തിലുള്ള സംയോജനം, പ്രതിരോധശേഷി, ശക്തമായ ഭരണം എന്നിവ ആവശ്യമുള്ള സംരംഭങ്ങളിലേക്ക് ടിസിഎസ് ആന്ത്രോപിക്കിന്‍റെ ക്ലോഡ് മോഡലുകൾ എത്തിക്കും. ആഭ്യന്തര വിന്യാസം, സംയുക്ത മാർക്കറ്റ് ഓഫറുകൾ, ഇൻഡസ്ട്രി കോ-ഇന്നൊവേഷൻ, തൊഴിലാളി ശാക്തീകരണം എന്നിവ സംയോജിപ്പിക്കുന്നതിലൂടെ, സംരംഭങ്ങളിലുടനീളം ഇത് പ്രാവർത്തികമാക്കാനും ഗുണഫലങ്ങൾ നൽകാനും ഈ പങ്കാളിത്തം ഉപഭോക്താക്കൾക്ക് സഹായകരമാകും.

എൻജിനീയറിങ്, ഫിനാൻസ്, ലീഗൽ, മാർക്കറ്റിംഗ്, സെയിൽസ് മേഖലകളിലായി 50,000 അസോസിയേറ്റുകളെ ടിസിഎസ് ക്ലോഡ് വഴി സജ്ജരാക്കും. ആന്തരികമായി ക്ലോഡ് വിന്യസിക്കുന്നതിലൂടെ, സ്വന്തം പ്രവർത്തനങ്ങളിൽ വരുന്ന മാറ്റത്തിന്‍റെ അനുഭവം ടിസിഎസ് നേരിട്ട് നേടുകയും ഉപഭോക്താക്കളുടെ വിജയത്തിനായി ഈ ഉൾക്കാഴ്‌ചകൾ പ്രയോജനപ്പെടുത്തുകയും ചെയ്യും.

ഫിനാൻഷ്യൽ സർവീസുകൾ, പബ്ലിക് സർവീസുകൾ, ലൈഫ് സയൻസസ്, ഹെൽത്ത്‌കെയർ, ഏവിയേഷൻ, ടെലികോം, മെഡ്‌ടെക് തുടങ്ങിയ മേഖലകൾ ഉൾപ്പെടെയുള്ള വ്യവസായങ്ങളിലുടനീളം എഐ സൊല്യൂഷനുകളും സേവനങ്ങളും ടിസിഎസും ആന്ത്രോപിക്കും സംയുക്തമായി വിപണിയിലെത്തും. ടിസിഎസിന്‍റെ കൺസൾട്ടിംഗ്, എഞ്ചിനീയറിംഗ്, മാനേജ്‌ഡ് സർവീസസ് കഴിവുകളുടെ പിന്തുണയോടെ, ഡൊമെയ്ൻ അടിസ്ഥാനമാക്കിയുള്ള വർക്ക്ഫ്ലോകൾ, നവീകരണം, ഉപഭോക്തൃ അനുഭവ പരിവർത്തനം എന്നിവയ്ക്കുള്ള പരിഹാരങ്ങൾ ഇരു കമ്പനികളും ഒരുമിച്ച് കണ്ടെത്തും.

ടിസിഎസ് ഉത്പന്നങ്ങൾ, പ്ലാറ്റ്‌ഫോമുകൾ, വിവിധ മേഖലകളിലെ ഡൊമെയ്ൻ സൊലൂഷനുകള്‍ എന്നിവയിലേക്കും ഈ പങ്കാളിത്തം വ്യാപിക്കും. ഇന്ത്യയിലെ 1,500 നഗരങ്ങളിലായി 75 ദശലക്ഷത്തിലധികം വാർഷിക അസസ്‌മെന്‍റുകൾ ടിസിഎസ് അയോൺ നടത്തുന്നുണ്ട്. ഈ പങ്കാളിത്തത്തിലൂടെ ടിസിഎസ് അയോൺ ക്ലോഡ് മോഡലുകളിൽ മികച്ച പരിശീലനവും സർട്ടിഫിക്കേഷനും നൽകും. ഇത് എഐ-സർട്ടിഫൈഡ് തൊഴിലാളികളെ വാർത്തെടുക്കാൻ സഹായിക്കും.

എൻ്റർപ്രൈസ് എഐയുടെ മൂല്യം ബിസിനസ് സന്ദർഭം മനസ്സിലാക്കുന്നതിലും സങ്കീർണ്ണമായ സിസ്റ്റങ്ങളെ ഏകോപിപ്പിക്കുന്നതിലും മികച്ച എഐ എഞ്ചിനീയറിംഗ് പ്രതിഭകളെ പ്രയോജനപ്പെടുത്തുന്നതിലും നിന്നാണ് ഉണ്ടാകുന്നതെന്ന് ടിസിഎസ് സിഇഒയും എംഡിയുമായ കെ കൃതിവാസൻ പറഞ്ഞു. ക്ലോഡിനെ ഞങ്ങളുടെ വ്യവസായ വൈദഗ്ദ്ധ്യം, എഞ്ചിനീയറിംഗ് മികവ്, വലിയ തോതിലുള്ള പരിവർത്തന കഴിവുകൾ എന്നിവയുമായി സംയോജിപ്പിക്കുന്നതിലൂടെ, പ്രത്യേകിച്ചും വിശ്വാസം, പ്രതിരോധശേഷി, റെഗുലേറ്ററി അച്ചടക്കം എന്നിവ നിർണായകമായ വ്യവസായങ്ങളിൽ ഉത്പാദന വേഗം കൈവരിക്കാൻ ഞങ്ങൾ ഉപഭോക്താക്കളെ സഹായിക്കുമെന്നും അദ്ദേഹം പറഞ്ഞു.

കൃത്യതയ്ക്ക് ഏറ്റവും പ്രാധാന്യമുള്ള സന്ദർഭങ്ങളിൽ സുരക്ഷിതവും വിശ്വസനീയവും സഹായകരവുമായാണ് ഞങ്ങൾ ക്ലോഡ് നിർമ്മിച്ചിരിക്കുന്നതെന്ന് ആന്ത്രോപിക് സഹസ്ഥാപകനും സിഇഒയുമായ ഡാരിയോ അമോഡെയ് പറഞ്ഞു. ഞങ്ങളുടെ രണ്ടാമത്തെ വലിയ വിപണിയായ ഇന്ത്യയോടുള്ള ഞങ്ങളുടെ പ്രതിബദ്ധത ഈ പങ്കാളിത്തം കൂടുതൽ ആഴത്തിലാക്കുന്നു. ഈ പ്രദേശത്തും ആഗോളതലത്തിലുമുള്ള സംരംഭങ്ങൾക്കും പ്രൊഫഷണലുകൾക്കും ടിസിഎസ് ക്ലോഡ് എത്തിക്കുമെന്നും അദ്ദേഹം പറഞ്ഞു.

ലോകമെമ്പാടുമുള്ള സംരംഭങ്ങൾക്ക് എഐ അടിസ്ഥാനപരവും പരിവർത്തനപരവുമാകുമെന്ന ഞങ്ങളുടെ സമാനമായ ബോധ്യത്തെ ഈ പങ്കാളിത്തം പ്രതിഫലിപ്പിക്കുന്നുവെന്ന് ടാറ്റ സൺസ് ചെയർമാൻ എൻ ചന്ദ്രശേഖരൻ പറഞ്ഞു. ടാറ്റ ഗ്രൂപ്പിന്‍റെ വ്യാപ്‌തി, വിശ്വസനീയമായ ബന്ധങ്ങൾ, രാഷ്‌ട്രനിർമ്മാണത്തിനുള്ള പ്രതിബദ്ധത എന്നിവയുമായി ആന്ത്രോപിക്കിൻ്റെ കഴിവുകൾ സംയോജിപ്പിക്കുന്നതിലൂടെ, ഞങ്ങൾ എൻ്റർപ്രൈസ് നവീകരണം ത്വരിതപ്പെടുത്തുകയും എഐ യുഗത്തിൽ മുന്നിൽ നിൽക്കാനുള്ള കഴിവുകൾ ഉപയോഗിച്ച് ഇന്ത്യയിലെ യുവാക്കളെ സജ്ജരാക്കുകയും ചെയ്യുകയാണെന്നും അദ്ദേഹം ചൂണ്ടിക്കാട്ടി.